.:| Howraman  |:.

مواره‌کت بۆ ئی شینه تازه
له‌رزا کرماشان، ڕژا ده‌روازه
هۆ خۆدا تا که‌ی ڕه‌نجوو به‌د به‌ختی
دا تاوه‌ی کۆردی بێ خه‌فه‌ت بازه

سجاد احمدیانی 1396/08/27

پاييز ئاماوه‌و ده‌رده‌داری من
خه‌زانوو وه‌شیو دڵ ئازاری من

هه‌واری چۆڵوو ئينتزاری من
ته‌مه‌و سه‌ركه‌شاو خه‌فه‌ت باری من

واره وارانوو بێ قه‌راری من !
تره‌كا هه‌ناروو تاسه‌باری من
===================
خش خشوو گه‌ڵاي تاسێنێ خه‌يلێ
چه‌مێ جه تاسه‌و ديداری كه‌يلێ

جه‌سڵه‌وه‌و خه‌ما كه‌شوو بێ مه‌يلێ
كه‌وت ڕا جه خه‌م جه هه‌رسا سه‌يلێ

به‌ش به‌يۆ شنه‌ی گۆڵ عۆزاری من
تره‌كا هه‌ناروو تاسه‌باری من
==================
ده‌ردێ خه‌زانی خاس كاريێنێ
په‌ڕ جه خه‌نجه‌ری زامداريێنێ

خه‌مێت عاده‌تێ ئيجباريێنێ
ئينه گرد وه‌شه بيماريێنێ

بۆ وينه ناڵه‌ی وه‌فاداری من
تره‌كا هه‌ناروو تاسه‌باری من
=================
خه‌مت ئازيزا چن خه‌م به‌ركه‌را
هه‌ناسه ! خه‌مێت تاكۆگه‌م به‌را

سه ره‌ی بی سه‌ودا ئاخر كه‌ی سه‌را
ژيوای دوور جه تۆ باخی بێ به‌را

هه‌و ئازيزگۆڵم !هه‌و نيگاری من !
تره‌كا هه‌ناروو تاسه‌باری من
==================
هه‌زار پاييزێ به‌يا حه‌ر هه‌نی
حه‌ر تۆ قيبله‌نی نه تۆی دڵ مه‌نی

گۆرانيێ عه‌شقی مه‌گه‌ر وێت وه‌نی
دڵوو رۆزگاری به‌ش بۆ ته‌وه‌نی

تاكه‌ی بێ جواب ئينتزاری من
تره‌كا هه‌ناروو تاسه‌باری من
==================
ئه‌گه‌ر سۆپای خه‌م خه‌زانی بارۆ
چه‌م حه‌ر روه‌كا دوريت مژمارۆ

كه‌ی بۆ وارانوو وه‌هاريت وارۆ
پێوه‌ره خه‌ مێ كه‌رمێوه شارۆ

حه‌ر تۆنی ته‌مای شه‌و بێداری من
تره‌كا هه‌ناروو تاسه‌باری من
===================
بۆرێوه كه‌سم با حه‌ر لاڵه‌ بۆ
ئه‌ر سواڵه‌نه با سواڵه بو

ژيوای حه‌رتا كه‌ی بێ تۆ تاڵه بۆ
تاكه‌ی شه‌وو رۆم په‌ڕ جه ناڵه بۆ

مانگه‌و چوارده‌ی په‌ی شه‌وگاری من
تره‌كا هه‌ناروو تاسه‌باری من
====================
خه‌ميار فيدات بۆ حه‌ر تۆنی ژيوای
بيه‌يت زه‌رورا حه‌ر پێسه هه‌وای

شاهم سا ره‌حمێ كه‌ره به گه‌دای
ده‌ی نيم نيگايێ حه‌ر چن په‌ی ده‌وای

شاهم! ئازيزم! چه‌م خۆماری من!
تره‌كا هه‌ناروو تاسه‌باری من

خه‌ميار هه‌ورامی

دڵوو ئه‌من دایم جه بێ قه‌راری
دڵوو تۆیچ وێش دان تانوو بێ عاری
داخم رۆیوه به‌یو بیاوونه تۆ
ده‌س بوزوو ده‌ستوو که‌رم دڵداری

20/03/1395

هه‌یتا هه‌یتا به چه‌مێ

جه دڵ مه‌سراونی خه‌مێ

بذیه با په‌ی زامانم

چه‌مێت بان به مه‌ڵهه‌مێ

هه‌ر ده‌رده‌ی بگری 'م' خوه‌م ده‌وای که‌م

ئه‌ر گۆناهیچ که‌ی، 'م' خوه‌م سزای ده‌م

هه‌ر که‌سه‌ی بتواید بایده خوازمه‌نیت

وه‌تیر بڕنه‌و کۆنا کۆنای که‌م

03/08/1394

سه‌د جاری بو به قۆروانه‌و خۆدای

به دڵوو تۆ مه‌ڕدش ڕچه‌و وه‌شه‌سیای

تا ئامان دڵم بسپاروونه تۆ

لام که‌ردۆوه دیم ،ناماوه لوای

1394/07/19

وه‌خته‌ی زۆڵفه‌یلد خه‌یده بان شانه

عالــــــه‌م و ئایه‌م که‌یده دیوانـــه

زیاتر وه یه، شیتمــــان نـــــه‌کــه

گیانم وه نه‌زر ئه‌و دوو چــه‌وانه

1394/07/12

یاخوا بمێڕیان ده‌سێش رۆزگار

به دور وسه‌و تۆ، وسانێش هه‌وگار

تۆ لوه‌یو به‌ڵام جیاتی ده‌موو تۆ

هام ده‌مم بی به دوکه‌ڵی سیگار

1394/06/28

نه‌‏زانام کوجیۆ وه‌‏شه‌‏سیایی
موه‌‏رۆ بۆنبه‌‏سوو دووریو جیایی
هه‌‏زار ڕای لوان تا بیاوو به تۆ
یاگێ تۆ یاوان شاروو ته‌‏نیایی

1394/06/10

بابه‌م هه‌ر وه‌خته نا ئه‌یوه یانه
قاڵه‌ی وه‌ش که‌رێ به تیرو تانه
واچێ پچی نمه‌لی کاره‌ی گیری وه‌ر
ئی شیعرێ په‌ی تۆ نمه‌وانێ نانه

1394/05/20

چا ڕۆوه‌ شێوه‌و چه‌مانت پیویا
گڕت وست دڵم، شێت بی دێویا
هه‌رچی مه‌دۆنووش،هه‌رچێ مه‌لاونووش
ئارام نمه‌گێرۆ ئی یانه‌ شێویا

1394/02/15

ساعه ت 11 شه وێ

به‌خێڵیم به‌رد ئه‌و ئاینه‌و ئۆتاقێت
هه‌میشه‌و دایمه چه‌مش نا چه‌متۆ
شه‌ڵای ئه‌منیچێ سووراو بیاینێ
په‌ی جاره‌یچ بیه‌ن،ده‌م بنیۆ ده‌متۆ

1394/02/06

ساعه‌ت 11 شه‌وێ- پاوه

یه‌که‌م جار چه‌مم وست دلێ چه‌مانت
دڵ یه‌کۆ خزا، کــه‌وت چیروو پانت
ئازیز هۆشت بۆ! ئی دڵـــه ناســکه‌ن 
نه‌کــه‌ریش پاشێل، ده‌س به‌ دامــانت

جارجاره‌ی کزه‌و هه‌ناسه‌ی
دڵم مه‌وزۆ ویرو تاسه‌ی
تاسێوه‌ به ره‌نگوو بۆو تۆ
ده‌ساوو ئی دڵه‌ وه‌سواسه‌ی